Luke 7
Árómáani-kwayoꞋnakona kwaasái.
Mátíyu 8:5-13
1Ísu mináyáátáár-áímbá simátímatuwena Kápénéamu-noapaꞋa komáyowana 2Árómáani-i-kwaasiti kawáánáꞋá ména kwená kwayóꞋnáꞋá aráái tówaimba áíꞋa kwéuwana puwíndayavena kwéena máyowana 3minkáwáánákó Ísumo tamáyon-aimba iséna Yútaa-anon-kwaasiyavena séna Ísumba koáíꞋmaeꞋa tíyana taasóvamankaino séna tiꞋmarówasa 4ÍsunopaꞋa asiramái kosésa minkáwáánákó Yútaa-kwaasiya kwésuwaꞋnaa-ena kentáásí monoꞋ-námbá úmakaimba póna kawe-kwáásí po kaweꞋá umái koáwaꞋnaa íníyone suwaná 6Ísu iséna miwísé kwéna minkáwáánákóná naambá egwaaꞋá kwáyonkaꞋa kúwana minkáwáánákó kwená kwaási simátimena séna ÍsunopaꞋa kosimámeꞋa maará simáméro. anóndakoo kentáásí kawáánákó séna kemá sáwíyan-kwaasi úmpo emá anón-kwaasi ómpo ivátuwe kesí naaúmpaꞋa íyínda uwóvíꞋa íníyone. 7mindáyavai íma enópaꞋa kosimámakaunda po íma kesí naaúmpaꞋa iyé úwoi aaiyé suꞋmai sinaná kesí kwayóꞋnáꞋá asóváíno. 8kegwáráꞋá kawáá-máyáígóná ááimba awánaraunda kesí kawáánákó sisaꞋá kwená mayáí kwémaeꞋa kesí i-kwáásíyávéꞋa súnasa kesí mayáí kwémayaawe. moóráwaintaveꞋa séꞋa kwaaó súnana kwégwisaꞋa moóráwaintaveꞋa séꞋa tiyó súnana kwétisaꞋa kesí kwayóꞋnátávéꞋa mirá uwómó súndantemba mirá kwéiye siyé. Ísumba kosimáméro súwasa tiꞋmarówai tésa tasimámúwana 9Ísu mináímbá iséna áátavai éna kogwanténa kwenánaaembo kwaꞋmaésamo kun-kwáásíyóntávéna séna simátimeꞋa séꞋa minkwáásí Árómáani-kwaasigo kentávéna súwaꞋnaa ií-ásíráyámbá tokáiye kwésivo kesí kwaási Ísareri-kwaasivinkene óꞋon-kwaasivinkene íma mirán-áímbá kwésewe Ísu súwasa 10tiꞋmarón-kwaasi koyauwerésa tésa taawánomba kwayóꞋnáꞋá kaweꞋá umái máyowasa taawánaraawe.Ísu moóráwaimba usásinankarain-kwasai.
11Ísu sáwíyankaꞋa ména tiyuwéna kwená kwayó-kwáásíyé sáwíva-kwaasiye kúmba Néni-naopaꞋa kwéna 12mindáókona óntan-kurigona ontaraꞋá kúnkaꞋa moórá-ketor-ininko ááninko puwúwasa taagwiyaꞋmaésa sáwíva-kwaasi anówae kwétuwana 13Ísóigo anówamba awánómba arumbá umánkena séna íma iviꞋá taaó séna 14kúkútaa-tairaꞋa kotátorowasa taagwiyaꞋmaésa tun-kwáásí tamáúwana Ísu séna ívé-kwaasigoo usásinaao súwana 15pukómpinkemba usásinena aaí kwésuwana Ísu anówantavena áíꞋmae kwaaó súwasa 16amáparawai táátavai ésa Áánútu áwíꞋa mósá marésa sésa ívéꞋa Áánútun-aai sin-kwáásí anón-kwaasi kentáávímbá kwévaariye. Áánútu aiꞋmáráísana kwená kwaásiya súwaꞋnaa ií-kwáásíyá kúmiye suwaná 17mináímbá Ísuntavesamo sun-áínkó Yútiyaa-ayampaꞋa évarevar-awampaꞋa kóyáwé uráiye.Yóni nombó pétinkaraiwaina kwaasái.
Mátíyu 11:2-19
18mináínkó kóyáwé úwasa Yónina kwayó-kwáásí isésa Yónimba kosimámúwana kwená kwayóꞋnárai tááyowasarai tuyaná 19simátimena séna Ísumba maanáímbá koáísaa okaiyó. emá kumíníyonemo siráawaiyaꞋono. áꞋowawa ónómpo kemá kumíníwaina amuꞋmaránaumno siyé. kosekaiyó Yóni súwasarai isésarai 20ÍsunopaꞋa tasimámesarai Yóni nombá pétinkaiwai siꞋmáráísakai enópaꞋa túye. Yónimo simbá kumíníyonemo siráawaiyaꞋono. áꞋowawa ónómpo kemá kumíníwaina amuꞋmaránaumno siyé. Ísumba tasimámúyana 21minkánáávímbá Ísu sáwíva-kwaasi óꞋon-oꞋon-tiꞋa ún-kwaasi kaweꞋá umátinkena taraváá-kwámbá tirumpinkémbá kwémaitiyuwena túramba kavíkón-kwaasi túramba awánamai kaweꞋá uwaná 22Ísu Yónimo tiꞋmarón-kwaasiyavena séna tayauwerékai awánaan-tantaaꞋa ísáán-aimba Yónimba kosimámekai sékai túramba kavíkáiwai túramba awánamai kaweꞋá owaná tááꞋa kaúnkaiwai tááꞋa kwéisaawana tísamaima pukáiwai kaweꞋá umái tísamaima kwétaawana túma karáiwai kaweꞋá kwéumatinkena puwón-kwaasi kwéusasintinkena úwoi-kwaasi áséi-kwasai kwésimatimena séna 23kentávéna íma kaer-ímáyáá íyawai tirunkó kaweꞋá kwéiye siyé. Yónimba kosimámékaiyo Ísu súwasarai kurááiye.24Yónina kwayóꞋnárai tayauwerésarai kuyaná Ísu Yónin-aai amápa-kwaasi simátimena séna Yóni kavóná-maravaꞋa máyáísaꞋa koawánéꞋa nóran-imayaa kwéera koawánaraao. úndá toréna umá mómaꞋmemaꞋo intenkáán-kwáásí Yónima iyé-ímáyáá uráao. ímanivo Yóni íma mirán-kwáásímán-ivo asirayán-kwáásímán-iye. 25nóran-imayaa kwéera koawánaraao. kawer-únánkwátói úmakainda-kwaasi Yónima iyé-ímáyáá uráao. ímanivo mirán-kwáásí kawer-únánkwátóigwara óísankwara-kwaasi anón-kwaasiti naaúmpaꞋa kwémaewe. 26nóran-imayaa kwéera koawánaraao. Áánútun-aai kwésiwai Yónima iyé-ímáyáá uráao. owé. Áánútun-aai kwésiwaiman-iye. áraiꞋa simátimeꞋa séꞋa kwemá Áánútun-aai siráawai usáyaaitaraiye. 27Áánútun-aai aúváí-kwandaaivimba Yónin-aai simái agaimaréna séna
- Áánútu séna isaaó. moóráwaimba aiꞋmáráanana kesáái maimaéna ená aivaꞋá kwéna ená aambá kwiyíníye siráiye
Ísu aísamairaꞋa masawémba atírain-kwasai.
36moórá-tawai ámáán-kawaa-kwaasigo áwíꞋa Sáímoni kwemá Ísuntavena séna kesí naaúmpaꞋa toómbá tamandaaó súwana kwená naaúmpaꞋa iréna toómbá ugwénowana 37mindáópaken-inimba eénánkáꞋá naaún-ininko Ísu ámáán-kawaa-kwaasigona naaúmpaꞋa ména toómbá kwénaiye-aimba minínínkó iséna óntan-anaveumpimba áséi-kwiyumba úm-basawemba kwáyomba maimaéna 38mindáúmpáꞋá iyéna Ísun-ánaaempaꞋa aísamaivimba uména iviꞋá kwétowana aꞋnumá kaꞋmaéna Ísu aísamairaꞋa kumúwana minínínkó ayáátáár-aꞋnontaunei aísamairakemba kwéuwaena aísamai kwéamoꞋnena áséi-kwiyumbo úm-basawemba aísamairaꞋa atímarowana 39ámáán-kawaa-kwaasigo Ísumbo ááyowai awánéna imáyáa éna séna minkwáásígómó Áánútun-aai kwésiwaimo inkákáí aísamairaꞋo uyátokain-inimba eénánkáꞋá naaín-ininko iyé-ímáyáá isinó séna mirán-ímáyáá úwana 40Ísu minkwáásígóntávéna séna Sáímoniyo moórá-aimba simámenae súwana minkwáásígó séna anóndako siyó súwana 41Ísu séna moóráwai óntamba kwétimiwai ména moóráwaimba sáwívar-ontamba siyáánkai-tamayor-ontamba aména moóráwaimba sáwíyan-ontamba moórá-tamayor-ontamba ámísana 42aanávómbó amí-kánáá tisasaráí óntamba íma kwáyáísasarai avakáá uwááesarai kwenópaꞋa tíyana séna kanaánivo íma meéyámbá mayánaumpo keináraiti meéyán-túwíꞋa tawígauvatuwaumpo kokaiyó siráiye-aimba Ísu Sáímonimba simámena séna mindáyavena mirámó sintávéna minkáé-kwáásígóráí tirunkó aamoí kwéumankaiye. moóráwai ávááraumai aamoí kwéumankaimba nááwaꞋiyo Ísu áísaa ena súwana 43Sáímoni séna sáwívar-ontambo mairénamo aanávómbó ímo máamisanamo meéyán-áwíꞋa tawígáúvatuwaiwai anón-aamoi kwéumankaiye Sáímoni súwana Ísu séna mindáyaveꞋo súnda áꞋa séne simásuwena 44kogwanténa minínínkómbá awánéna Sáímontavena séna minínínkómbá awánaao. ená naaúmpaꞋa iyúnda kentáásí ááimba sísamaimo sese ií-nómbá íma siménana minínínkó iviꞋá kwétaisana aꞋnumá sísamairaꞋa kúmísana kwenaꞋnónáunei uwákaiye. 45paruvará íma umásinkaanana minínínkó sísamaima taamóꞋnamoꞋna uráiye. 46kentáásí ááimba íma siꞋnómpáꞋá masawémba asinkáánana minínínkó sísamairaꞋa áséi-kwiyumba im-básáwémbá atímai asínkaraiye. 47mináímbá simámeꞋa séꞋa minínínkóná amápa-sawi-imayaa mayauwáúnda póna kembá anón-aamoi umásinkena mirán-tántááꞋá kaweꞋá umásínkáiye. ánivo moóráwaimbo kíto-sawi-yantaaꞋo mayauwáúnda sáwíyan-aamoi kwéumasinkaiye Ísu Sáímonintavena simásuwena 48minínínkóntávéna séna ená sáwí-imayaa mayauwáúmne súwasa 49kwesémo toómbó kwénon-kwaasi keáímbá sésa kwaásiti sáwí-imayaa kwémaitiyuwaiwaima mindá nóran-kwaasiyaꞋiyo suwaná 50Ísu minínínkóntávéna séna kentáváí áraire sénaꞋa ená sáwí-imayaa mayauwéꞋa kaweꞋá umánkaumpo aánoumai paru umái kwaaó Ísu siráiye.
Copyright information for
KZE